బాలీవుడ్ బాద్‌షా షారుక్ ఖాన్‌ను వెనక్కి నెట్టి రెండో స్థానం సొంతం
హీరో అక్కినేని నాగచైతన్యతో ఎంగేజ్‌మెంట్ తర్వాత నటి శోభితా ధూళిపాళ్ల గురించి నెటిజన్లు గూగుల్‌లో ఎక్కువగా సెర్చ్ చేశారు. దాంతో ఆమె ఈ వారం IMDb ఇండియన్ పాప్యులర్ సెలబ్రిటీల జాబితాలో ఒక్కసారిగా పైకి ఎగబాకారు. ఆమె బాలీవుడ్ బాద్‌షా షారుక్ ఖాన్‌ను వెనక్కి నెట్టి రెండో స్థానం సొంతం చేసుకున్నారు.ఈ జాబితాలో బాలీవుడ్ నటి శార్వరీ వాఘ్ అగ్రస్థానంలో నిలిచారు. ఆమె నటించిన ‘ముంజ్యా’ మూవీ విజయంతో ఆమె క్రేజ్ అమాంతం పెరగడమే ఇందుకు కారణం. షారూఖ్ మూడో స్థానం దక్కించుకున్నారు. కింగ్ ఖాన్ తర్వాత నాలుగు, ఐదు స్థానాల్లో వరుసగా కాజోల్, జాన్వీ కపూర్ ఉన్నారు.పారిస్ ఒలింపిక్స్‌లో మంచి ప్రదర్శన చేసిన బ్యాడ్మింటన్ ప్లేయర్ లక్ష్యసేన్, బాలీవుడ్ నటి దీపికా పదుకొణె, ‘మహారాజ’తో బ్లాక్ బస్టర్ సక్సెస్ అందుకున్న విజయ్ సేతుపతి, హీరోయిన్ మృణాల్ ఠాకూర్, ఐశ్వర్య రాయ్ టాప్-10లో చోటు సంపాదించారు.కుటుంబ సభ్యుల సమక్షంలో గత గురువారం చైతన్య, శోభితల నిశ్చితార్థం జరిగిన సంగతి తెలిసిందే. వీరి పెళ్లి తేదీని ఇంకా ప్రకటించలేదు. ఈ సడెన్ ఎంగేజ్‌మెంట్ తర్వాత శోభిత మరింత హాట్ టాపిక్‌గా మారారు. శోభిత, చైతన్యలు తమ రిలేషన్‌ను చాలా గోప్యంగా ఉంచారు. ఎక్కడా కూడా తమ బంధాన్ని బయట పెట్టలేదు.2023లో లండన్‌లో ఈ జంట దిగిన వెకేషన్ ఫోటో ఒకటి బయటకు వచ్చి బాగా వైరల్ అయింది. కానీ చైతన్య, శోభిత దీనిపై ఎప్పుడూ స్పందించలేదు. ప్రస్తుతానికి, శోభిత ‘సితార’ అనే బాలీవుడ్ మూవీలో నటిస్తున్నారు. ఆమె ‘మంకీ మ్యాన్’ చిత్రంలో నటించారు. డిస్నీ హాట్‌స్టార్‌లో స్ట్రీమింగ్ అవుతున్న ‘ది నైట్ మేనేజర్‌’లోనూ కనిపించారు. నాగ చైతన్య ప్రస్తుతం చందూ మొండేటీ దర్శకత్వంలో ‘తండేల్’ చిత్రం చేస్తున్నారు.