అల్లు అర్జున్ – సుకుమార్ కాంబినేషన్‌లో తెరకెక్కిన ‘పుష్ప-2’ చిత్రం డిసెంబరు 5వ తేదీన విడుదలకానుంది. ఈ చిత్రం ప్రమోషన్ కార్యక్రమాలు జోరుగా సాగుతున్నాయి. ఆదివారం రాత్రి కూడా ‘పుష్ప-2’ చిత్రం ఓ ప్రీరిలీజ్ ఈవెంట్‌ను నిర్వహించింది. అలాగే, ఆదివారం కిస్సిక్ పేరుతో ఓ లిరికల్‌ సాంగ్‌ను రిలీజ్ చేసింది. పుష్ప-1 తొలి భాగంలో హీరోయిన్ సమంత నటించిన ఊ అంటావా మామా ఊఊ అంటావా మామా పాట ఎంత పెద్ద హిట్టో అందరికీ తెలిసింది. ఇపుడు పుష్ప-2లో ఈ కిస్సిక్ అనే ఐటమ్ సాంగ్‌ను యువ హీరోయిన్ శ్రీలీలపై చిత్రీకరించారు. ఈ పాటకు దేవీ శ్రీ ప్రసాద్ బాణీలు అందించగా, చంద్రబోస్ సాహిత్యం సమకూర్చారు. సుబ్లాషిణి ఆలపించారు. ఈ పాట విడుదలైన కొన్ని గంటల్లో నాలుగు మిలియన్ల వ్యూస్‌తో ట్రెండింగ్‌లో నెంబర్ వన్ పోజిషన్‌కు చేరింది.
