ఇండియన్‌ ఆర్మీ ఆఫీసర్‌ దివంగత మేజర్‌ ముకుంద్ వరదరాజన్‌ జీవిత కథ ఆధారంగా రూపొందిన ‘అమరన్’ సినిమా పాన్ ఇండియా స్థాయిలో రేపు ప్రేక్షకుల ముందుకు రాబోతుంది. భారీ అంచనాలున్న ఈ సినిమాలో తమిళ స్టార్‌ హీరో శివ కార్తికేయన్ హీరోగా నటించగా, సౌత్‌ స్టార్‌ హీరోయిన్‌ సాయి పల్లవి ఈ సినిమాలో శివ కార్తికేయన్‌కి జోడీగా నటించింది. రియల్‌ లైఫ్ పాత్రల్లో నటించిన వీరిద్దరూ వారి వారి పాత్రల్లో జీవించారంటూ మేకర్స్ ప్రమోషన్స్ సందర్భంగా చెబుతూ వస్తున్నారు. ఇలాంటి కథలకు, సినిమాలకు ఉత్తరాదిన మంచి ఆదరణ ఉంటుంది. అందుకే అమరన్ సినిమా హిందీ డబ్బింగ్ వెర్షన్‌పై చాలా అంచనాలు ఉన్నాయి. హిందీలో అన్ని సినిమాల మాదిరిగా కాకుండా ‘అమరన్’ ను ప్రత్యేకంగా విడుదల చేయాలని నిర్మాతలు భావిస్తున్నారు. అందుకే అక్కడ ప్రముఖ నిర్మాతలతో ఒప్పందాలు చేసుకుని భారీ ఎత్తున విడుదల చేస్తున్నారనే వార్తలు వస్తున్నాయి. రిలీజ్ విషయం పక్కన పెడితే హిందీ వెర్షన్ కోసం సాయి పల్లవి ఫస్ట్‌ టైమ్‌ డబ్బింగ్ చెప్పిందట. హిందీలో తన సొంత వాయిస్‌తో డబ్బింగ్ చెప్పినట్లు సాయి పల్లవి వెల్లడించింది. గతంలో తన సినిమాలు, సిరీస్‌లకి హిందీ డబ్బింగ్ చెప్పని సాయి పల్లవి మొదటి సారి ఈ సినిమా కోసం హిందీలో డబ్బింగ్ చెప్పి సాహసం చేసిందనే చెప్పాలి. హిందీ బాగానే మాట్లాడటం వచ్చినా డబ్బింగ్ విషయానికి వస్తే కచ్చితంగా రిస్క్‌ అనడంలో సందేహం లేదు. తన పాత్రలోని భావోద్వేగాలను ప్రేక్షకులకు మరింత చేరువగా తీసుకు వెళ్లడం కోసం, తన పాత్రను హిందీలోనూ పండించడం కోసం, కొన్ని ఎమోషనల్‌ సన్నివేశాల్లో తన సొంత వాయిస్‌ అయితేనే బాగుంటుంది అనే ఉద్దేశ్యంతో సాయి పల్లవి స్వయంగా నిర్మాతలతో మాట్లాడి హిందీలోనూ డబ్బింగ్ చెప్పిందట. హిందీలో సాయి పల్లవి చెప్పిన డబ్బింగ్ సెట్‌ అవ్వడంతో ఆమెను కంటిన్యూ చేశారట. సాయి పల్లవిని చూస్తూ, ఆమె వాయిస్‌ని వింటూ ఎమోషన్‌ని ఎక్కువ ఫీల్‌ అయ్యే అవకాశం ఉంటుంది. అందుకే అమరన్ సినిమా హిందీ వర్షన్‌ కి సాయి పల్లవి డబ్బింగ్ ప్రధాన ఆకర్షణగా నిలుస్తుందనే అభిప్రాయం ఇండస్ట్రీ వర్గాల్లో వినిపిస్తోంది. మేజర్‌ ముకుంద్ వరదరాజన్‌ భార్య ఇందు రెబెకా వర్గీస్‌గా సాయి పల్లవి నటించింది. ఇప్పటికే లుక్ విషయంలో ప్రశంసలు దక్కించుకుంది. రెబెకా ను దించేసిందని ట్రైలర్‌ విడుదల తర్వాత చాలా మంది కామెంట్స్ చేశారు. సాయి పల్లవి ఏ పాత్రలో నటించినా పరకాయ ప్రవేశం చేసినట్లుగానే చేస్తుంది. అమరన్ సినిమాతో మరోసారి ఆ విషయం నిరూపితం అవ్వబోతుందని అంతా నమ్ముతున్నారు. సౌత్‌ లో సాయి పల్లవి కోసం ‘అమరన్’ చూడాలని కోరుకునే వారు చాలా మంది ఉన్నారు.
