భారత రెజ్లింగ్ సంఘం నుంచి ఫొగాట్‌కు మద్దతు లభించలేదు :భర్త సోమ్‌వీర్

వినేశ్ ఫొగాట్ విషయంలో కోర్ట్ ఆఫ్ ఆర్బిట్రేషన్ ఫర్ స్పోర్ట్స్ (సీఏఎస్) తీర్పు భారత క్రీడాభిమానులకు నిరాశను కలిగించింది. ఈ తీర్పు వినేశ్‌కు అనుకూలంగా రాలేదని, అలాగే ఇలాంటి క్లిష్ట పరిస్థితుల్లో భారత రెజ్లింగ్ సంఘం నుంచి తగిన మద్దతు అందలేదని వినేశ్ భర్త సోమ్‌వీర్ రాఠీ ఆవేదన వ్యక్తం చేశారు.ఫొగాట్, సీఏఎస్ తీర్పు తర్వాత ఢిల్లీ చేరుకున్నప్పుడు విమానాశ్రయంలో అభిమానులు ఆమెకు ఘన స్వాగతం పలికారు. ఈ సందర్భంలో మీడియా సోమ్‌వీర్‌ను వినేశ్ రిటైర్మెంట్ నిర్ణయంపై ప్రశ్నించగా, ఆయన స్పష్టమైన సమాధానం ఇవ్వలేదు.భారతీయులు వినేశ్‌కి చూపించిన అభిమానాన్ని అనుభవించడం ఒక గొప్ప అనుభవం అని ఆయన అన్నారు. ఈ విషయంలో సహచరుల నుంచి కూడా మద్దతు లభించిందని తెలిపారు. అయితే, సీఏఎస్ తీర్పు మరియు రెజ్లింగ్ సంఘం మద్దతు లేకపోవడం వల్ల తమకు ఎదురైన నిరాశను వివరించారు. అథ్లెట్లకు సంఘం అండగా ఉండటం అవసరమని ఆయన వ్యాఖ్యానించారు.