కామవరపుకోట
పదహారేళ్లగా సమాజ సేవ చేస్తున్న గారపాటి చౌదరిని ఎంపీగా ఎన్నుకుంటే ఏలూరు ప్రాంతం శరవేగంగా అభివృద్ధి చెందటం ఖాయమని ప్రముఖ సినీ గేయ రచయిత అనంత శ్రీరామ్ అన్నారు. ఆదివారం కామవరపుకోట మండలం కామవరపుకోట, కళ్ళచెరువు,తడికలపూడి గ్రామాల్లో బిజెపి నేత గారపాటి చౌదరి తరుపున జబర్దస్త్ కళాకారులు, సినీ గాయకులు పర్యటించి ప్రచారం నిర్వహించి సందడి చేశారు. మోడీ నేతృత్వంలోని కేంద్ర బీజేపీ ప్రభుత్వం చేసిన అభివృద్ధి, సంక్షేమ కార్యక్రమాలు, తపన ఫౌండేషన్ ద్వారా గారపాటి చౌదరి చేస్తున్న సేవలను వివరిస్తూ జబర్దస్త్ కళాకారులు అదిరే అభి, అప్పారావు, బాబీ, వినోద్(వినోదిని), ఇమ్మాన్యుయేల్ హాస్య భరిత ప్రదర్శనలు చేయగా. సినీ గాయకులు వినూత్న,అరుణ్ కౌండిన్య లు సినీ పాటలను స్థానికులను ఉర్రూతలూగించారు. ప్రముఖ సినీగేయ రచయిత అనంత శ్రీరామ్ మాట్లాడుతూ కేంద్రంలో మూడోసారి బిజెపి ప్రభుత్వం రావడం ఖాయమని అదే పార్టీకి చెందిన గారపాటి చౌదరిని ఎంపీగా గెలిపించుకుంటే అభివృద్ధి వేగవంతం అవుతుందని అన్నారు. చదువు విలువ తెలిసిన ఒక రైతు బిడ్డగా తపన ఫౌండేషన్ ద్వారా పేద విద్యార్థుల చదువుకు స్కాలర్షిప్ లను అందించడం, నీటి ఎద్దడి ప్రాంతాలకు మంచినీటి ట్యాంకర్లను అందించడం, మహిళలకు ఉచిత కుట్టు శిక్షణ కేంద్రాలు ఏర్పాటు వంటివి ఎన్నో సేవా కార్యక్రమాలు సొంత నిధులతో చేస్తున్న గారపాటి చౌదరినీ వచ్చే ఎన్నికల్లో పార్లమెంటు సభ్యునిగా ఎన్నుకున్నట్లయితే అభివృద్ధి చేసి చూపెడతారని సినీ గేయ రచయిత అనంత శ్రీరామ్ అన్నారు. మోడీ ప్రభుత్వ పథకాల గురించి, గారపాటి చౌదరి సేవా కార్యక్రమాలు గురించి పలు ప్రశ్నలను స్థానికులను అడిగి సమాధానం చెప్పిన వారికి బహుమతులను అందజేశారు. పెద్ద సంఖ్యలో స్థానిక ప్రజలు ఈ కార్యక్రమానికి హాజరై వీక్షించారు. ఈ కార్యక్రమంలో చింతలపూడి నియోజకవర్గ కన్వీనర్ ఏసు వర ప్రసాద్, కాకి చంటి, ఎస్సార్ లక్ష్మీ సూర్యనారాయణ రాజు, లక్ష్మీపతి, భాను తదితరులు పాల్గొన్నారు.
బిజెపిని ఆదరించాలంటూ జబర్దస్త్ టీం ప్రసారం
